Нашите предавачи

Роден и живее во Скопје, Македонија. Откако во средно училиште станува следбеник на Христос, служи во повеќе црковни сегменти — музичко славење, работа со студенти, мисиска работа во Битола со сопругата Анет, како и основање на Евангелската црква „Соулкрафт“. Предава во Скопје, во Македонија, на Балканот, во Европа и Северна Америка во областите Нов Завет, мисија, уметност и евангелизација. Татко е на Жизел-Мариа Галевска; неговата сопруга Анет-Мариа Галевска замина при Бога, во Царството Небесно, во 2021 година.

Роден во Скопје во 1971 година, своите први чекори во теологијата ги започнува во 1992 година со ICI (International Correspondence Institute), тогаш дописна програма од Теолошкиот факултет во Осијек, Хрватска. Во 1994 продолжува во Будимпешта на IBLA (International Baptist Lay Academy), каде завршува во 1999 година. Во меѓувреме учи во Лондон во Аби Скул и на неколку наврати го посетува Регент Парк Колеџ во Оксфорд. Продолжува на постдипломски студии во Нови Сад на Протестантскиот теолошки факултет и магистрира во 2008 година на тема „Баптизмот во Македонија“. Во 2010 година ги довршува студиите по физика на Природно-математичкиот факултет. Во 2011 година истражува за мисионерското движење во САД и неговото влијание на Балканот — во Витон Колеџ (Чикаго), Теолошката школа на Универзитетот Јеил (Њу Хејвен) и Архивата на Интернационалниот мисиски борд на Конвенцијата на јужните баптисти во Ричмонд. Во 2014 година магистрира историја во Скопје на Институтот за национална историја на тема „Евангелско-протестантските цркви во Македонија“, а во 2018 година таму докторира со темата „Сонцето и лавот како симболи во хералдиката и вексилологијата на Македонија“. Научните интереси му се историјата на црквата во Македонија и правната положба на верските заедници, како и хералдиката, вексилологијата и фалеристиката. Старешина и одговорно лице на Христијанската црква „Божји глас“.

Филип и Лин Џексон се посветени меѓукултурни работници (мисионери) речиси 30 години, служејќи со SEND International во Македонија од 1995 година. Филип има магистратура по меѓукултурни студии од Columbia International University, а Лин има диплома по меѓународни односи од Samford University. Гледаат да прават ученици во сè што прават и низ годините се вклучени во црковно формирање, развој на лидерство и организациско водство. Во моментов служат како регионални директори за Европа за SEND International. Израснати во мисионерски семејства (Филип во Суринам и Доминиканската Република, а Лин во Костарика), нивниот животен фокус е да живеат во оглед на вечноста, да го сакаат Господ со сето свое срце и да го активираат Божјиот народ да ја воспостави и изгради Црквата меѓу недопрените луѓе.

Моментално е европски директор на организацијата „Ашреи“, чија цел е да го интегрира духовното оформување како категорија во подготовките и обуките за мисионери и црковни служители. Со семејството живее во Солун, Грција, од 2018 година. Најпрво нивната служба беше посветена на бегалци од Блискиот Исток, кои почнаа да го следат Христос во тој контекст; во моментов таа вклучува инвестирање во цркви и верници во источна Европа. Дел од студиите на Даниел опфаќаат додипломски студии по Нов Завет, магистратура по историја на филозофијата и докторат по историја на теологијата, кој го завршува во 2010 година на Vrije Universiteit во Амстердам. Автор е на книгата „En Route to the Confessions: The Roots and Development of Augustine's Philosophical Anthropology“ (Leuven: Peeters, 2013), а наскоро излегува и „Soul Whisperer: Jesus' Way among the Philosophers“, чија содржина е попристапна за пошироко читателство. Даниел работел седум години како професор во Теолошката школа во Остин, Тексас, и шест години како професор по теологија во Библискиот институт во Загреб, Хрватска.

Роден и живее во Скопје заедно со сопругата Ана и нивните два сина. Тој е еден од основачите на Евангелско-протестантската црква „Гласност“, каде служи со проповедање и водење на славење повеќе од дваесет години. Магистер е по филозофија, а неговите главни интереси се од областа на филозофијата, теологијата, литературата и културата.

Еден од неговите главни интереси е воден од прашањето: „Како до континуирана и значајна промена во животот на Христовите следбеници?“ Од ова прашање произлегува една од главните тези на предметот „Духовно оформување“. Како пастор и практичар на оваа тема, веќе шеста година експериментално ги применува овие учења во животот заедно со неговата заедница — ЕПЦ „Гласност“.

Филип Иванов е роден на 25 април 1989 година во Велес, Македонија, каде што живее до денес. На седумнаесетгодишна возраст одлучува да го следи Христос и да Му го посвети животот. Наоѓајќи го својот духовен дом во Евангелската црква — Велес, почнува да служи меѓу младите; речиси три години води младински состаноци во Велес, но и во Штип и Неготино. Во 2009 година, заедно со сопругата Марија, заминуваат за Англија на двегодишно теолошко образование. По завршувањето на Библискиот колеџ, Филип ја развива и интернационалната проповедничка служба, при што проповеда на пет различни континенти, со посебен фокус на мисијата во Африка. Во 2017 година го презема раководството на Евангелската црква — Велес, каде и денес е пастор. Најпрепознатлив аспект на неговата служба е милосрдната дејност што ја започнува и развива таму, вреднувана не само од црквите, туку и од различни владини и невладини институции, како и од заедницата и општеството. Добитник е на наградите „Филантроп на годината“ и „9-ти Ноември“, двете од Општина Велес.

Слоботка Алексовска е родена на 1 август 1960 година во Скопје, каде што живее и работи до денес. Дипломирала, магистрирала и докторирала на Институтот за хемија при Природно-математичкиот факултет во Скопје, каде е вработена од 1986 година. Нејзиниот научен интерес е од областа на синтетската и структурната хемија, но е ангажирана и во унапредувањето на образованието по хемија. Како христијанка, се стреми кон активно учество во животот на црквата. Направила преводи на повеќе христијански книги и текстови и учествувала во неколку трибини за врската меѓу науката и религијата. Учествува и во работата со децата во црквата.

Редовен професор на Катедрата за уставно право и политички систем при Правниот факултет „Јустинијан Први“ во Скопје. Автор е на повеќе универзитетски учебници и научни трудови од областа на политичкиот систем, политичките партии, правниот статус на верските заедници, слободата на вероисповед и локалната самоуправа. Во својата професионална кариера бил и пратеник во три мандати во македонскиот парламент. Учествува во бројни национални и меѓународни проекти посветени на унапредувањето на правото и демократските процеси. Во приватниот живот е сопруг, татко и рекреативен планинар.